Prófið búið

Frjáls eins og fuglinn.
Vetri mínum í Háskólanum í Leeds er lokið. Prófið búið. Nú er gaman að lifa. Svo fann ég líka síðbúna afmælisgjöf í pósthorni skrifstofunnar. Gjöfin var síðbúin af því að gáfumennin á skrifstofunni settu tilkynninguna um umslagið í skúffuna hjá vitlausum turni. Takk Helga! Þetta eru einmitt bókmenntir við mitt hæfi um þessar mundir. Fyrst engar Syrpur eða Andrésblöð eru við hendina. Svo fer ég til Redditch á morgun og verð þar í góðu yfirlæti í nokkra daga. Lífið gæti ekki verið mikið betra.

Jú, reyndar. Það eru þrjú ljós á ganginum í íbúðinni. Miðjuljósið er búið að blikka stöðugt í nokkra daga. Rosalega pirrandi. Svo er líka einhver á hæðinni mikið fyrir að kveikja á reykelsi, hvílík stybba sem gerir þar að auki innrás í herbergið mitt. Hvergi friður. En, þetta eru nú bara minniháttar umkvörtunarefni. Fátt skyggir á gleði mína í dag. Ekki einu sinni rapptónlistin sem ómar frá herberginu hans Steve. Né árásir skordýranna. Neibb. Í dag er ég í góðu skapi. Svona til tilbreytingar. Svotil algerlega ósofin - að venju - en það skiptir bara engu máli. Ég er kát og glöð. Best að hafa færsluna ekki lengri að sinni, óttast að þið farið að halda að ég sé komin á einhver gleðiefni.

Svo er ekki. Kveð að sinni. Er farin í nokkurra daga frí. Góðar stundir.